“Imāni maṁ daddara tāpayanti, Vācāduruttāni manussaloke; Maṇḍūkabhakkhā udakantasevī, Āsīvisaṁ maṁ avisā sapanti”.

“Sakā raṭṭhā pabbājito, aññaṁ janapadaṁ gato; Mahantaṁ koṭṭhaṁ kayirātha, duruttānaṁ nidhetave.

Yattha posaṁ na jānanti, jātiyā vinayena vā; Na tattha mānaṁ kayirātha, vasamaññātake jane.

Videsavāsaṁ vasato, jātavedasamenapi; Khamitabbaṁ sapaññena, api dāsassa tajjitan”ti.

Daddarajātakaṁ catutthaṁ.