“Ubhinnaṁ devarājūnaṁ, saṅgāmo samupaṭṭhito; Ahosi samupabyūḷho, mahāghoso avattatha.

Padumuttaro lokavidū, āhutīnaṁ paṭiggaho; Antalikkhe ṭhito satthā, saṁvejesi mahājanaṁ.

Sabbe devā attamanā, nikkhittakavacāvudhā; Sambuddhaṁ abhivādetvā, ekaggāsiṁsu tāvade.

Mayhaṁ saṅkappamaññāya, vācāsabhimudīrayi; Anukampako lokavidū, nibbāpesi mahājanaṁ.

Paduṭṭhacitto manujo, ekapāṇaṁ viheṭhayaṁ; Tena cittappadosena, apāyaṁ upapajjati.

Saṅgāmasīse nāgova, bahū pāṇe viheṭhayaṁ; Nibbāpetha sakaṁ cittaṁ, mā haññittho punappunaṁ.

Dvinnampi yakkharājūnaṁ, senā sā vimhitā ahu; Saraṇañca upāgacchuṁ, lokajeṭṭhaṁ sutādinaṁ.

Saññāpetvāna janataṁ, padamuddhari cakkhumā; Pekkhamānova devehi, pakkāmi uttarāmukho.

Paṭhamaṁ saraṇaṁ gacchiṁ, dvipadindassa tādino; Kappānaṁ satasahassaṁ, duggatiṁ nupapajjahaṁ.

Mahādundubhināmā ca, soḷasāsuṁ rathesabhā; Tiṁsakappasahassamhi, rājāno cakkavattino.

Paṭisambhidā catasso, …pe… kataṁ buddhassa sāsanaṁ”.

Itthaṁ sudaṁ āyasmā saraṇagamaniyo thero imā gāthāyo abhāsitthāti.

Saraṇagamaniyattherassāpadānaṁ tatiyaṁ.